في غفلة ٍ هزت خفوقي من اقصاه
مرت ملامح من سعى في سنينه
هذا الذي ماظن انسى عطاياه
الوافي اللي ضمنا في يدينه
يارخص هرج ٍ نذكره من سجاياه
والحق والله ماوفيناه دينه
ياما تعب ياما تعذب بدنياه
ماقال آه ٍ يومنا حاضنينه
يضحك بوجه الصاحب اللي تلقاه
كبير قلب وليتكم عارفينه
((ابوي)) لامن جيت ابذكر حلاياه
واعطيه حقه ضعت انا من حنينه
فكري يتشتت لاطرى بس طرياه
يضيع شعري ماوفى نور عينه
وشلون ابوصف والشعر والله اخطاه
الشعر ضايع من رضى والدينه
هذا الذي ابغى الرضى منه وارجاه
الوافي اللي ماوفيناه دينه